Psykologspesialist/psykolog

Avdeling for rusmedisin (AFR), Haukeland universitetssjukehus, har ansvar for behandling og oppfølging av menneske med skadeleg bruk av rusmiddel og avhengigheit. AFR har om lag 340 tilsette. AFR består av sju seksjonar som inneber tre døgnseksjonar, forskingsseksjon, LAR, poliklinikk, samt den nyoppretta Seksjon Ambulant som den utlyste stillinga er tilknytt. AFR er i ein spennande utvikling knytt til både forsking og utvikling av differensierte tenester. Avdelinga har faste fag- og forskingsdagar, og legg til rette for individuell vidareutdanning, samt felles kompetanseheving.

Seksjon Ambulant er ein heilt ny seksjon i AFR med målsetjing om å sikre tidlegare oppstart av gode behandlingsløp, samt hjelpe menneske med rusmiddelavhengigheit som ikkje nyttiggjer seg ordinær poliklinisk behandling. Poliklinikkane i AFR har hatt eigne team for ambulerande verksemd. AFR har no styrka denne tenesta gjennom å opprette Seksjon Ambulant, som skal stå sentralt i avdelinga si satsing på fleksible og ambulante tenester. Per tid er det tilsett ein seksjonsleiar, ein overlege og sju ambulante behandlarar.