Verdig vinnar

Rundt 70 fagfellar, medforskarar og vener var møtt fram for å hylla Haavind, ikkje bare for framifrå fagformidling, men like mykje for alt ho har gjort og framleis gjer for kvinne- og kjønnsforskinga i Norden.

– Hanne Haavind har vore ein fødselshjelpar, sa president i Norsk Psykologforening An-Magritt Aanonsen i opninga, og peika på korleis prisvinnaren har hjelpt fram forsking om folk sine kvardagsliv.

Mange var dei som drog fram Haavind sine ualminnelege evner som rettleiar. Agnes Andenæs kalla dei i si helsing for segnomsuste, og både helsingar og gratulasjonar under sjølve utdelinga, og den livlege praten under mottakinga etterpå, viste at prisvinnaren hadde hatt eit ord med i laget når det gjaldt dei vitskaplege meritteringsskriftene til svært mange av dei frammøtte.

Tradisjonen tru fekk også årets prisutdeling ei verdig musikalsk ramme. Bassolist ved Den Norske Opera, Magne Fremmerlid, blei akkompagnert av pianisten Magnus Loddgard. Saman presenterte dei eit knippe mannlege lagnader frå opera- og musikalverda, frå Mozarts Sarastro til Gershwins Porgy.

Viktig pådrivar

Sosiolog og leiar ved Nordisk Institutt for kvinne- og kjønnsforskning (NIKK), Øystein Gullvåg Holter, heldt gratulasjonsforedraget. Han drog mellom anna fram prisvinnaren sin styrke som skarp observatør av samspelet mellom kjønna og i familien. Holter understreka korleis kvinneforskaren Hanne Haavind òg har vore svært viktig for mannsforskinga.

– Haavind har aldri vore i nærleiken av å sjå menn som ei monolittisk blokk med bare ei kjønnsinteresse. Ho ser forskjellar og variasjonar blant menn, understreka han.

Ifølgje Holter var Haavind, saman med Berthold Grünfeld, ein viktig pådrivar for at Noreg etter arbeidet med Menn i Norge-undersøkinga i 1988 innførte verdas mest likestilte ordningar for omsorgspermisjon i samband med fødslar.

På tide

Holter kunne òg pressentera nye og til no upubliserte survey-resultat som på slåande vis underbygger dei kvalitativt funderte hypotesane som Haavind for halvtanna år sidan sette fram i artikkelen ho fekk pris for.

I takketalen lova Hanne Haavind at ho verkeleg skulle prøva å ta til seg æra. Den til vanleg smålåtne prisvinnaren innrømte at ein kunne tenkja at det var på tide ho fekk prisen, i og med at ho har vore doktorgradsrettleiar for tre tidlegare vinnarar.

Ho avslutta med eit ønske om at psykologien i framtida ville visa seg endå meir nyfiken på menneska sine ulike forsøk på å oppnå noko i eigne liv.